韩国综艺节目《Running Man》自从Gary下车之后，又闹出宋智孝同金钟国「被下车」事件！令呢个逢星期日陪住大家足足7年嘅王牌综艺节目，差啲就此玩完停播！好彩《Running Man》最后都渡过难关，更加入新成员梁世灿和全昭旻。无可否认冇咗智孝同Gary呢对「周一情侣」互动之后，《Running Man》嘅精彩位都减少咗，相信睇开RM嘅观众都会有同感吧？幸好随住新成员同旧有成员愈嚟愈有默契，《Running Man》嘅新CP又诞生喇！佢哋就係全昭旻同李光洙，呢对CP唔单止私底下上过对方屋企过夜，更有「定情信物」添！而大家在《Running Man》又睇过几多全昭旻同李光洙暧昧嘅一幕？
随住Gary下车又结婚，Gary同智孝呢对《Running Man》周一情侣已经正式「分手」！
全昭旻同李光洙CP缘份係咁开始嘅！
讲到全昭旻同李光洙「缘份的开始」，就要讲到昭旻今年3月仲未成为《Running Man》固定成员时，以嘉宾演出的一集。当时全昭旻同李光洙做拍档，而身为「背叛Icon」的光洙竟然反被全昭旻背叛，两人嘅「冤孽缘」就係咁展开！
全昭旻同李光洙宜家已成为《Running Man》新CP喇！（网上图片）
全昭旻未成为《Running Man》固定成员之前，就己经成为背叛李光洙的女人。
浪漫过偶像剧嘅定情手绳！
《Running Man》成员今年6月去日本玩战慄迷宫嘅一集，成员们一齐走入精品店，而当全昭旻见到条宫崎骏手绳好锺意，更撒娇要李光洙买，当时光洙一句：「讲埋啲冇用嘅嘢！」点知最后埋单时，光洙二话不说cool爆递手绳送俾昭旻，原来光洙竟特登折返买手绳呢！呢一幕係咪好似台湾电影《我的少女时代》入面，王大陆偷偷买刘德华公仔锁匙扣送俾宋芸桦一样咁浪漫呢？9月一集《Running Man》内，李光洙要同全昭旻去印度尼西亚接受惩罚，昭旻更戴住呢条定情手绳现身，仲问光洙靓唔靓！李光洙即刻笑开花话：「好衬你！」真係闪爆人群！
李光洙唔声唔声买手绳送俾全昭旻，咁浪漫嘅？（网上截图）
全昭旻仲戴仲手绳拍摄，更问李光洙靓唔靓！（网上截图）
全昭旻冧男星，李光洙会呷醋！
最近好多韩国男神上《Running Man》做嘉宾，全昭旻认真好福气，唔单止可以同姜河那互相撒娇扮情侣，仲伸手摸过成勳嘅胸肌！不过次次都俾李光洙发现，而光洙仲会冲出去阻止，就连成员刘在锡同Haha都怀疑两人有古怪，Haha更话：「呷醋嘅话有啲古怪喎！」
李光洙见到全昭旻摸成勳胸肌，即刻呷醋！（网上截图）
醉酒过夜事件！
李光洙上过全昭旻屋企过夜，仲见埋家长，呢件事已经通晒天！两位当时人都承认过，当时李光洙饮醉酒不醒人事，全昭旻刚好打电话俾光洙，于是代理司机将光洙带到昭旻屋企，第二日光洙瞓醒仲同昭旻爸爸合照添！「过夜事件」尚未完结，最新播出嘅一集《Running Man》中，李光洙已戴住测谎机被Haha同宋智孝「盘问」！Haha问到上次同全昭旻一齐去印度尼西亚时，昭旻有冇入过李光洙间房？当李光洙答「冇」之后即被测谎机狠狠电了！即係讲大话！李光洙立即澄清话只係喺房入面倾过拍摄事宜，不过Haha同宋智孝就一于好少理！到底全昭旻同李光洙呢对《Running Man》新CP，係节目效果定戏假情真，就留俾观众自己想像喇！
